വാഷിങ്ടണ്‍: 16 വര്‍ഷത്തിനിടെ ആദ്യമായി വിദേശ സഹായം സ്വീകരിക്കുന്നതിലെ എല്ലാ നിയന്ത്രണങ്ങളും അവസാനിപ്പിച്ച ഇന്ത്യക്ക് അവശ്യ വസ്തുക്കള്‍ കയറ്റി അയച്ച്‌ ജോ ബൈഡെന്‍റ അമേരിക്ക. 1,000 ഓക്സിജന്‍ സിലിണ്ടറുകള്‍, 1.5 കോടി എന്‍ 95 മാസ്കുകള്‍, 10 ലക്ഷം റാപിഡ് ഡയഗ്നോസ്റ്റിക് ടെസ്റ്റുകള്‍ എന്നിവക്കു പുറമെ അമേരിക്കയില്‍ വിതരണത്തിനായി ആസ്ട്ര സെനകക്ക് ഓര്‍ഡര്‍ ചെയ്ത രണ്ടു കോടി കോവിഡ് വാക്സിനുകളും ഇന്ത്യക്ക് കൈമാറും. വ്യാഴാഴ്ച എത്തി തുടങ്ങുന്ന സഹായം അടുത്ത ആഴ്ചയോടെ പൂര്‍ണമാകും.
അമേരിക്കയില്‍ കോവിഡ് പ്രതിസന്ധി രൂക്ഷമായ ആദ്യ ഘട്ടത്തില്‍ ഇന്ത്യ സഹായം അയച്ചതിന് സമാനമായി തിരിച്ചും അയക്കുകയാണെന്ന് വൈറ്റ്ഹൗസ് വക്താവ് അറിയിച്ചു.
ഇന്ത്യയില്‍ കഴിഞ്ഞ ദിവസം കോവിഡ് മരണം രണ്ടു ലക്ഷം പിന്നിട്ടിരുന്നു. വ്യാപനം കൂടുതല്‍ രൂക്ഷമാകുന്ന രാജ്യത്ത് പലയിടത്തും ആശുപത്രികള്‍ നിറഞ്ഞുകവിഞ്ഞതും ഓക്സിജന്‍ സിലിണ്ടര്‍ ലഭ്യത ശുഷ്കമായതും കനത്ത പ്രതിസന്ധി സൃഷ്ടിക്കുകയാണ്. 3.60നു മുകളിലാണ് ഇന്ത്യയിലെ പ്രതിദിന കണക്ക്. മരണം 3,200 ന് മുകളിലും.
0 التعليقات: