നാഗ്പുര്‍: രാജസ്ഥാനിലെ നാഗ്പുരില്‍ 35 വര്‍ഷത്തിന് ശേഷം പിറന്ന പെണ്‍കുഞ്ഞിനെ വീട്ടിലെത്തിക്കാന്‍ ഹെലികോപ്ടര്‍ വാടകക്കെടുത്ത് കുടുംബം. മാര്‍ച്ച്‌ മൂന്നിനാണ് ഹനുമാന്‍ പ്രജാപതിനും ഭാര്യ ചുകി ദേവിക്കും പെണ്‍കുഞ്ഞ് പിറന്നത്. കുഞ്ഞിന് ഇരുവരും റിയ എന്ന് പേരിടുകയും ചെയ്തു.
നാഗ്പുരിലെ ആശുപത്രിയില്‍നിന്ന് പ്രസാവാനന്തര ശുശ്രൂഷകള്‍ക്കായി അമ്മയെയും കുഞ്ഞിനെയും ചുകിയുടെ വീട്ടിലേക്ക് കൊണ്ടുപോകുകയായിരുന്നു. ഹര്‍സോലവ് ഗ്രാമത്തിലാണ് ചുകിയുടെ വീട്.
'എന്‍റെ മകളുടെ വരവ് സന്തോഷകരമാക്കാന്‍ എന്തും ചെയ്യുമായിരുന്നു. അതിനാല്‍ കുഞ്ഞിനെ ഗ്രാമത്തിലെത്തിക്കാന്‍ ഹെലികോപ്ടര്‍ യാത്ര തെരഞ്ഞെടുക്കുകയായിരുന്നു' ഹനുമാന്‍ പറഞ്ഞു.
നിംബ്ഡി ചന്ദവാദ ഗ്രാമത്തിലാണ് ഹനുമാന്‍റെ താമസം. അവിടെനിന്ന് ചുകിയുടെ ഗ്രാമമായ ഹര്‍സോലവിലേക്ക് 40 കിലോമീറ്ററാണ് ദൂരം. ഹെലികോപ്ടറില്‍ 10 മിനിറ്റുകൊണ്ട് അവിടെയെത്താനാകും.
ഹനുമാനും ബന്ധുക്കളായ മൂന്നുപേരും ഹെലികോപ്ടറില്‍ ആദ്യം ചുകിയുടെ ഗ്രാമത്തിലെത്തുകയായിരുന്നു. അവിടെനിന്ന് ഭാര്യയെയും മകളെയും കൂട്ടി നിംബ്ഡി ഗ്രാമത്തിലേക്ക് തിരിച്ചു.
കുടുംബത്തില്‍ 35 വര്‍ഷത്തിന് ശേഷം പെണ്‍കുഞ്ഞ് ജനിച്ചത് ആഘോഷമാക്കുന്നതിന് പിതാവ് മദന്‍ലാല്‍ കുംഹാറാണ് ഈ ഐഡിയ പറഞ്ഞതെന്ന് ഹനുമാന്‍ പ്രജാപത് പറഞ്ഞു.
'സാധാരണ പെണ്‍കുട്ടികളുടെ ജനനം ആരും ആഘോഷിച്ച്‌ കാണാറില്ല. എന്നാല്‍ ഞങ്ങള്‍ക്ക് പെണ്‍കുട്ടിയും ആണ്‍കുട്ടിയും തമ്മില്‍ യാതൊരു വ്യത്യാസവുമില്ല. ഞാന്‍ മകളെ പഠിപ്പിക്കുകയും അവളുടെ സ്വപ്നങ്ങള്‍ സാക്ഷാത്കരിക്കുകയും ചെയ്യും' -പ്രജാപത് പറഞ്ഞു.
0 التعليقات: